Årets siste barmarkstur er tradisjon tru ein lett tur for å evt. få med familiar. I år var denne lette turen satt opp til det 329 meter høge Mykjebusthornet på Ellingsøya. Ingen familiar dukka opp, men istaden kom det 3 gamle fjellhugarar og 2 debutantar som kan verte framtidige medlemar.

Det var ein flott haustdag, heilt vindstille og lettskya. Altså perfekt fjellver.

Vi møttest på Vik skule, midt på sørsida av Ellingsøya. Derfrå gjekk vi på god rås oppover lia til vi kom til høgste punktet. Derfrå gjekk vi rett vestover i omlag 3 kilometer, delvis på god rås og delvis i oppgådd småmyrer.

Vi kom først til den lille toppen på ca 320 moh, og så gjekk vi vidare ca 1 km til for å kome til den høgste toppen på 329. Der åt vi nistepakke og slappa av før vi gjekk ned att same ruta.